Varo no ka bong e Sambalod ka dino. Pagasu no e Samabalod ka dino, tim-tiim mamanau ka e Sambalod dino sid tanga dot himbaan ka dino sampai tolu not burul om tolu napu dot nobulandai di Sambalod kadino nga amu e nakajang dot iimporizon ka dino. “ Aik, kadi sambalod, sompiza mahi beti, ongo duvo ogi ot burul om duvo napu dot obulandai, kaanu aku no dot ongo iimporizon” ka di Sambalod.
Pamanau kam pamanau ka e Sambalod dino, mazad pod it sid koturu no ot burul dot nobulandai dialo ka dino, ining-iningo po di Samabalod ka dino usig dot asu ka dau dino, okon noko nokuro ino ka, intod ko monguningou not hamadon dot gama pongusig dit asu dot lalakou di Samablod ka dino. Tongkus-tongkuso no di Sambalod ka dino tu humago mongimot dit nunu it yusig-usig dit tasu dau ka dino. “ Nunu ma bot nahadjangan di adasu diti tu mad biano pom biano ot mad tanid ot gama mongusig” ka di Sambalod.
Om korikot ka e Sambalod dino sinod asu dau ka dino, nunu ka dialo kinimatan ka dino dot mondiu-sondiu ot Sarou dot banal ko avasi ka, imot e ot gikou dot tana’i ka dot kavasi ka. Na, tinumpuun po ka diri dot varot opurimanan di Sambalod ka dino dot mad varo sumumpal ponong sid piuvakan dau ka ino. Nunu ka ong ti tongokusai diti ong kemot dot asanggong ot ondu. Ka di Sambalod, “ kuran no mat kaagai-agazan ku diti tondu diti” ka di Sambalod ka. Na ka di Sambalod “ adi” ka di Sambalod, “ tiiti’im-ti’im oku dinot parai bungku nu adi” ka di Sambalod.
Nga, ka dit Sarou, “kavasa e beno nga pintahanon oku ong opongo kono” ka dit Sarou ka. Om gima tu sumolot no banal ka it pinuhobo di Sambalod ka dino, om ginaka’o no di Sambalod ka inot Sarou dino, au amu ogi nekas ot domburan ka dino om nopongo e Sambalod ka dino, tu tudungan di Sambalod ka dino ot panantangaan dinot Sarou ka dino, au nunu dialo kenimatan ka dino dot yadko linapak ot marahang dot budui ka dino. Na ka di Samabalod, “ nopongo oku no adi” ka di Sambalod ka dino.
Om kentahan nopo ka inot Sarou dino ka, ka dit Sarou ka “ naru toli nu Ambalod” ka dit Sarou ka dino. Om nokoviliu amu dinot sarou ot dolou dau ka dino om, tiim-ti’im numaru ot toli di Sambalod ka dino, miarasau-rasau dot ongo dalid ka dino. Na ka di Sambalod, “ oduraka kono adi” kadi Sambalod, “ pahu nopogi ong amu nakalan oku dikau nga amu pintahanon tikau” ka di Sambalod.
Manjadi tu tumonod no dino inot tadau dino ka, na pangagama no e Sambalod dot Balod porogi ka dino tu posuvangan dit toli dau ka. Nokosuvang nopo inot toli di Sambalod ka dino sinod Balod dau, singkunai no di Sambalod ka dino om bobo’o no muli inot toli dau ka dino. Mokud-okud po e Sambalod ka dino mamanau tu avagatan dit toli dau ka dino. Na mazad pod it marou no ka, na nokorikot no e Sambalod sinod binatang dino ka.
Om kindakod sid valai ka e Sambalod ka dino, ohuzud no ka inot tanganak dau sumamung ka dino. “ Yama-yama”, ka dit tanganak di Sambalod ka dino, “ hodi no yama, navagatan dot ovit dot bakas” ka dit tanganak di Sambalod ka dino. “ Bakas kanto dikou, nga tolis di ama dikou ino” ka di Sambalod ka. Om pilombus yi Sambalod ka dino sumuva sid ongkob ka dino rumosi ko emot dot ulun ka dino omlakaso no di Sambalod ka inot toli dau ka dino.
Njadi, yadino not kinosondoto dinot vangun di Sambalod ka dino nga mad kakal e dot amu morogo. Sinod binatang ka dino, varot turu ot momodsuni dot banalko ongovavasi ka dino, nga e Sambalod diti okon noko kensid pos id sirang dau tu muntun-untun ot toli dau sid toning ka dau ino. Nga it tongo momodsuni dit ponuruton ogi antawa it lompupukan ogi, akin no ma ong it ongo mindai haring, amu no mad kinsosolon di Sambalod ka. It tingod-tingodon di SAmbalod ka, it turu it sumuni dit banalko avasi ka.
Gima tu banalko anaru ot toli di Sambalod ka dino, amu ogi osusa e Sambalod minsid sinod sirang dau ka. It harati di Sambalod ka dino, iso om agazon dau it ongo momodsuni dit avasi kadino sampai otikid. Sonsodop ka dino, iso ot sobuhan di Sambalod ka dino, om ongoi noko ongoi tu bai ivondoi di Sambalod ka inot toli dau ka ino. Mazad po dit ongo limo no ot natampakan di Sambalod inot ongondu ka dino, na mad nogulou not binatang ka dino. Manjadi, song-ingat-ingat ka inot ongo ongondu ka dino.
Mazad po dit sid koturu no sodop ka dino om norikot no it ondu dit koturu tu mad randavi-randavi no ong inot koturu ka dino, panantapi no inot ondu dino ka dot turu milapis muga ka dino. Om mazad po dit tumanga no sodop ka om momongodop no it ongoulun dot binatang ka, varo not opurinizan dit ondu ka dino dot mad morus-korus ka dino. Nga inot ondu dinot koturu ka dino, amu minodop ka ino, gamko mudu-sudu ot dazap ka sid ropuhan ka dino.
Om vudut po ka dino, amu songkuro ka iri om imot not ondu dot tinumuhak it toli di Sambalod sid pialatan dot palampag dit noginsang ka dino. Om kemot no ka dino ondu ka dino, odoromoi no ka inot ondu dino managanu dit dazap dit nilasu dau ka, om yad ko rinalak dot apui ot kararagang dinot dazap ka dino tu banal ko alasu ka. Om mad topisai ie dit ondu ka inot toli di Sambalod ka dino nga okon noko nokuro ka dino, olonggou ogi ot ongo origi dino ka dit oguguan dinot toli di Sambalod ka dino tu moginuhod tu olosuan.
Om tiim-ti’im gumogok ka inot toli di Sambalod ka dino, vaiko miningkod gumogok ka ino ong yad po dot tontog ka dino tu linumonit no ka dino. Nga gima tu banal ko orualan e Sambalod ka dino, amu ingod e SAmbalod dot mivuringos-ringos ka dino sodop adau. Mazad pod it koturu no sodop ka dino, tinumadak no inot toli di Sambalod ka dino om labput-labput po ot raramou ka dino dot kolu’u dot nana ka dino. Nga otonidan e Sambalod ka dino tu varo mad song-rongiu ot ening dot mad kolu’u dot ihad dot anak dot kosino po ka dino. Om nunu ka ot kinimatan ka dino dot turu ot anganak dot ondu nopo dot banalko ongo sososrongot ka dino. Na, yadino no ka ot kinotuvado dinot vangun di Sambalod ka dino, kianak dot turu ot anak dot andu nopo ka om kongosukod ka ino nga banal ko ongo vavasi ka, yadko it kaavasi dit Sarou dit gininaka di Sambalod.
Na Nompus No.